Prokuroria e Elbasanit ka mbyllur hetimet pas dy vitesh, për funksionarët dhe simpatizantët e Partisë Demokratike në Elbasan dhe Librazhd që i bllokuan rrugën dhe goditën eskortën në të cilën qarkullonte kryeministri Edi Rama.
Sipas burimeve mediatike, pasi nuk ka ende një njoftim zyrtar nga organi i akuzës, Prokuroria e Elbasanit ka marrë të pandehur ish-deputetin Aurel Bylybashi, kreun aktual të PD në Librazhd, Bujar Vreto, kreun e PD në Prrenjas, Arjan Karrizi, funksionarët e PD Erlind Gurra dhe Leonard Ozuni dhe dy simpatizantët të kësaj force politike, Bujar Kojku e Dashamir Boja.
Bëhet fjalë për ngjarjen e regjistruar në qershor 2019, gjatë fushatës për zgjedhjet lokale të 30 qershorit, të cilat bojkotoi opozita. Në hyrje të Librazhdit grupi i militantëve të PD-së ishin grumbulluar në mes të rrugës ku edhe u konfliktuan me policinë. Gjatë momentit që po kalonte eskorta e kryeministrit Rama, ata u vërsulën për t’i bllokuar rrugën, por nuk u lejuan nga policia. Të gjendur në këto kushte ata nisën të hidhnin sende të forta dhe kapsolla ndaj policisë dhe makinave shoqëruese të Ramës.
