Në Bllokun e Ambasadave në Tiranë, në kujtim të 2 korrikut 1990 është vendosur një monument për të simbolizuar eksodin e rreth 5 mijë shqiptarëve, të cilët për 11 ditë qëndruan brenda ambasadave për një jetë të lirë, ku regjimi komunist mori goditjen më të fortë ndonjëherë.
2 korrik 1990 është një nga ngjarjet më të rëndësishme historike në Shqipëri. Kjo datë përbën një pikë kthese në rrjedhën e ngjarjeve dhe ardhjen e pluralizmit në vitet ’90. Me rënien e diktaturës komuniste në vendet e tjera të lindjes, edhe regjimi komunist në Shqipëri filloi të jepte shenjat e para të rënies së saj.
2 korriku i vitit 1990 konsiderohet si moment historik i quajtur si eksod i madh i shqiptarëve, i cili i dha goditjen fillestare të regjimit të Byrosë Politike në Shqipëri. Qindra e mijëra shqiptarë mësynë drejt dyerve të ambasadave të huaja në Tiranë të cilat iu hapën atyre portën drejt lirisë së munguar.
