Dy persona kanë mbetur të vdekur nga një tornado që goditi ishullin e vogël italian, Pantelleria. Tornado goditi ishullin në jug të Sicilisë gjatë orëve të para të mbrëmjes së kaluar.
“Për shkak të stuhisë së madhe, shtyllat u përkulën, çatitë u dëmtuan dhe pemët u rrëzuan”, thanë zjarrfikësit. Ky ishull është i banuar kryesisht nga njerëz që janë me pushime.
Agjencia italiane e lajmeve ANSA tha se një zjarrfikës dhe një burrë 86-vjeçar kishin humbur jetën. Viktimat ishin në vetura, të cilat fluturuan në ajër dhe u përmbysën dhe një makinë ra në çati, ndërsa tjetrës i ishte thyer pjesa e përparme.
Nëntë persona janë në mesin e të plagosurve, dy prej të cilëve në gjendje kritike, tha kryebashkiaku i Pantelleria, Vincenzo Vittorio Campo, për TV Sky TG24, dhe deri më tani nuk ka asnjë informacion për të zhdukurit.
