Gjimnastja amerikane, Simone Biles, fajësoi Federatën e Gjimnastikës të SHBA-ve dhe një “sistem të tërë” për “lejimin” e Larry Nassar, mjekut të ekipit kombëtar, që të abuzonte me të dhe qindra atlete të tjera për 20 vjet.
“Fajësoj Larry Nassar, në të njëjtën kohë edhe sistemin që e lejoi të abuzonte. Gjimnastika e SHBA-ve dhe Komiteti Olimpik dhe Paraloimpik i SHBA-ave e dinin që mjeku zyrtar i ekipit po abuzonte,” – tha Biles para Komitetit Gjyqësor të Senatit të SHBA-ave.
Kampionia olimpike akuzoi gjithashtu FBI-në se u kishte “kthyer shpinën” gjimnastëve, duke iu përgjigjur në mënyrë joadekuate dhe të ngadalë akuzave të para ndaj Nassarit për abuzim seksual, gjë që e lejoi ish-mjekun të vazhdonte të kryente abuzimet e tij për muaj të tërë.
“Unë nuk dua që ndonjë atlet i ri apo ndonjë individ tjetër të pësojë tmerrin që unë dhe qindra të tjerë kemi duruar dhe vazhdojnë të durojnë deri më sot,” – vijoi Biles, që nga emocionet e mëdha shpërtheu në lot para dhjetëra ligjvënësve që e shikuan atë në heshtje.
Në fillim të dëshmisë së saj, Biles tha se nuk mund të imagjinonte një vend që do ta bënte atë të ndihej më keq sesa dhoma e komisionit të Senatit. Pranë saj u ulën tri gjimnaste të tjera olimpike të cilat u abuzuan nga Nassar: McKayla Maroney, Maggie Nichols dhe Aly Raisman.
