Lotar Matues ishte i befasuar nga paraqitja e skuadrës gjermane në Barcelonë. Ish-legjenda e Bajernit tha për “Sky Sport” se skuadra e Nagelsmanit bëri gjithçka mirë dhe kjo, për meritë të trajnerit. Për fitoren – “Ishte një fitore më se e merituar për Bajernin që dominoi në të gjitha aspektet. Nagelsman e kishte përgatitur mirë ndeshjen nga ana taktike duke parë edhe vështirësitë e kundërshtarit. Presingu i madh dhe loja e shpejtë bukosën spanjollët të cilët u dukën një skuadër e vogël. Shumë gjëra kanë ndryshuar te Barça, është diçka që duhet pranuar”, pohoi Lotar.
PËR NDESHJEN – “Ishte një pjesë e parë e dominuar nga Bajerni, Barcelona nuk ishte asnjëherë e rrezikshme. Mungesa e Mesit ndihet shumë, edhe pse duhet ta pranoj që dhe po të ishte ai, prapë skuadra do të vuante. Depaji u mundua të bënte diçka, por pa sukses pasi ishte i vetëm në sulm. Luk de Jong ende nuk është futur në mekanizmat e skuadrës dhe u duk që kishte vështirësi ndaj Upamekanos që për mua bëri një ndeshje të madhe, ndoshta më të mirën që kur ka ardhur te Bajerni”.
Për BAJERNIN – “Skuadra luajti shumë mirë, me dëshirë për të shënuar të parët dhe ia arritën. Loja më pëlqeu shumë. Nagelsman duket se është i qartë në atë çfarë dëshiron nga djemtë në fushë. Edhe pse pa disa prej lojtarë kryesorë, skuadra bindi në një fushë të vështirë si ajo e Barcelonës. Musiala duket sikur ka një jetë që luan në Mynih. Ai ishte iniciatori pothuajse i të gjitha sulmeve në portën kundërshtare, ndoshta Kuman e kishte harruar dhe i kishte kushtuar pak vëmendje djaloshit”.
PËR TIFOZËT – “Sigurisht që në një kohë normale, do të kishim më shumë tifozë në stadium. Gjithsesi, atmosfera ishte e këndshme, edhe pse mungoi ai elektriciteti që jemi mësuar të përjetojmë këtu. Sigurisht që atëherë ka qenë një skuadër tjetër që prodhonte një lojë ndryshe”.
