“Mini-shengenin” vijon të jetë pika e nxehtë në diskutimet midis Edi Ramës dhe Albin Kurtit. Kjo u pa edhe në konferencën e parë të përbashkët midis dy kryeministrave, të cilët nuk i fshehën dallimet që kanë për këtë çështje.
Kryeministri i Kosovës preferoi të fliste për “makro-shengen shqiptar”: “Ky ishte takimi ynë i parë, ka edhe shumë tema që do t’i trajtojmë edhe në të ardhmen. Kjo ishte një temë që e trajtuam, por shkurtimisht. Takimi ynë ishte për makro-shengenin shqiptar sesa për mini-shengenin ballkanik.
Kryeministri i Shqipërisë tha se ky projekt nuk është i mundur pa “mini-shengenin rajonal”: “Është e vërtetë që në këtë pikë kemi një diskutim për të çuar përpara. S’ka makro-shengen shqiptar, pa mini-shengen ballkanik. Makro-Shengeni shqiptar është i lidhur ngushtësisht me mini-shengenin rajonal sepse nëse jemi konsistent në vazhdën e procesit të Berlinit dhe ndërveprimin tonë, atëherë na hapet rruga që është e mbyllur prej të gjitha viteve për të pasur një hapësirë të përbashkët midis dy shteteve, lëvizje të lirë mes nesh, çka deri dje ishte e paimagjinueshme për shkak të rezistencës jo vetëm të Serbisë, por edhe të vendeve të tjera. Sot është në dorën tonë sepse unë e them me plotë gojën se këtë rezistencë e kam thyer. As Serbia dhe askush tjetër nuk mund të na thotë se po krijojmë Shqipërinë e Madhe.”
