Kryeministri Edi Rama po zhvillon një takim me krerët e bashkive dhe prefektët e qyteteve bregdetare, për të diskutuar mbi problematikat e ndotjes.
Kreu i qeverisë u shpreh se pastrimi i qyteteve duhet të jetë prioriteti numër një i kryetarëve të bashkive.
Rama kërkoi që bashkitë të planifikojnë financat e nevojshme për pastrimin, në rast të kundër buxhetet e tyre do të rrëzohen.
Kryeministri kërkoi edhe një qasje më agresive lidhur me ndotjen në rrugët kombëtare.
“Plehrat në rrugët kombëtare nuk kanë lidhje me koshat. Janë akte papërgjegjshmërie. Asnjë bashkie nuk do t’I miratojmë buxhetin në nivelin e prefekturës, nëse e miratojnë këshillat, nëse nuk kanë buxhetin e nevojshëm për pastrimin. Është bërë një përllogaritje dhe objektivi financiar, duhet të jetë objektivi numër një i çdo bashkie. Nëse ky nuk është objektivi i parë i çdo kryebashkiaku, ne do punojmë me këshilltarët që të rrëzojnë buxhetin. Nëse kalon në këshill, prefekti nuk do ta firmosë. Pastrimi do të jetë i pari”, tha kryeministri.
Ai gjithashtu shtoi se gjobat të domosdoshme, ndërsa deklaroi se kostoja e pastrimit është më e lartë se tarifa për qytetarët.
“Kjo është një sfidë qytetarë. Është shumë e qartë që pastrimi ka një kosto që është më e lartë se çfarë bashkitë i faturojnë qytetarëve dhe bizneseve. E them këtë për të gjithë ata që në vend se ta fillojnë nga vetja, por e fillojnë ne paguajmë taksa bashkitë nuk na përgjigjen. Që të jemi të qartë kontributet përmes tarifave të pastrimit janë nën kostot e pastrimit për Bashkitë. Kjo bën që Bashkitë të përballojnë me fonde ekstra një pjesë të kostos”, tha Rama.
