Detaje të reja kanë dalë në dritë në lidhje me vrasjen makabër të vogëlushit Mateo nga fqinji i tij Klodian Çalamani.
Mbrëmjen e djeshme, familjarët e 8-vjeçarit i janë drejtuar policisë së Fierit, ku kanë denoncuar një grua, e afërme e familjes, e cila mund të ketë dijeni mbi ngjarjen.
Ata kanë dalë në këtë përfundim duke u bazuar në sjelljet e saj gjatë këtyre ditëve.
Mësohet se disa deklarata të dhëna nga autori i ngjarjes, Klodian Calamani, përpara se të zbulohej trupi i pajetë i 8-vjeçarit, janë të njëjta me ato të gruas, e cila sipas burimeve për mediat, është më e madhe në moshë dhe banon pranë shtëpisë së Mateos dhe asaj të autorit të ngjarjes.
Po të njëjtat burime bëjnë me dije se ka qenë pikërisht i njëjti person ai që i ka thanë familjarëve të Mateos se një makinë kishte kaluar në rrugën pranë shtëpisë e ndoshta mund të kishte lidhje me humbjen e Mateos, e njëjta deklaratë dhënë nga autori.
Ndërkohë, grupi hetimor pritet që të marrë në pyetje gruan për të hedhur dritë jo vetëm mbi ngjarjen por edhe nëse ka pika kontakti me autorin e saj që mund ta përfshijnë.
