Diplomati i njohur Shaban Murati ka ngritur alarmin teksa ka theksuar se minishengeni ballkanik është një nismë serbe.
Sipas tij, me këtë projekt president serb kërkon të rikthejë Jugosllavinë e Vjetër.
Murati shpjegon se terminologjia mini-shengen ballkanik ishte një truk ballkanik për t’ia hedhur masave.
Diplomati vlerëson qëndrimin e Kosovës, e cila është shprehur disa herë kundër çdo përpjekje për krijimin e Jugosllavisë së re.
“Nuk është nismë rajonale, por është nismë serbe. Kjo nuk është e vetmja që lindi. Ballkani ka disa nisma rajonale dhe kuptohet që Shqipëria vërtet nuk ka të bëjë me raporte kontinentale, evropiane, po në rajon ku ti ke veten, ku ti je një shtet anëtar i NATO-s është e papranueshme ti mos veton, që asnjë lëvizje rajonale brenda këtyre shteteve të mos pranohet Kosova është një dobësi ndaç shtetërore ndaç diplomatike”, thotë Murati për Ora Neës.
Diplomati i njohur u shpreh gjithashtu se Shqipëria e ka pasur propozimin që në vitin 2016, ndërsa theksoi se vetë Vuçiç pasi u zgjodh President ka shprehur se “kërkon të rikrijojë Jugosllavinë e vjetër, plus Shqipërinë”
“Krijimi i këtij grupi është një sukses diplomatik i Serbisë. Presidenti i Serbisë, Aleksandër Vuçiç në 16 shtator 2016 në vizitën zyrtare në Paris ka propozuar krijimin e zonës së përbashkët ekonomike Ballkaniko-Perëndimore. Po ashtu ka deklaruar që ‘ëndrra ime është të krijoj zonën e përbashkët dhe tregun unik të Ballkanit Perëndimor’. Po në Paris, ai ka deklaruar se ‘ja kam paraqitur dhe udhëheqësve të tjerë të Ballkanit Perëndimor’. Pra, Shqipëria e ka marrë këtë propozim që në 2016. Nuk është ndjerë. Punë e saj pse nuk është ndjerë. Në 2017, 4 ditë pasi u zgjodh Presidenti, pra në 6 prill 2017, Presidenti i ri i Serbisë, Vuçiç ka dhënë një intervistë për një të përditshme amerikane ku deklaron tekstualisht “është rikrijimi i Jugosllavisë së vjetër, plus Shqipërinë”. Gazetari bën një artikull po atë ditë me titull “Plani i Serbisë për të rikrijuar Jugosllavinë”. Pra është një projekt që sanksionin rolin udhëheqës të Serbisë në Ballkanin Perëndimor”, shpjegoi Murati.
