Gjermania ka vendosur rregullat e reja lidhur me vaksinimet e detyrueshme për të hyrë në ambiente si dyqanet dhe baret nga fillimi i vitit të ardhshëm, si dhe masa të tjera të ashpra të reja për të ushtruar presion mbi pakicën e madhe të gjermanëve që deri më tani kanë refuzuar të marrin vaksinën.
Sipas Financial Times Angela Merkel, kancelarja dhe Olaf Scholz, kancelari i emëruar, njoftuan masat e reja pas një takimi të planifikuar me ngut me krerët e 16 shteteve të Gjermanisë, pasi vendi u përball me një rritje alarmante të infeksioneve Covid-19, duke krijuar një fluks të paprecedentë në spitalet gjermane.
“Vala e katërt duhet thyer”, u tha Merkel gazetarëve pas takimit.
Udhëheqësit vendosën të mbajnë një votim në Bundestag nëse do të futet një mandat i përgjithshëm vaksinimi, i cili ka të ngjarë të zbatohet nga shkurti e në vazhdim. Nëse zbatohet, vetëm të vaksinuarit dhe ata që janë shëruar nga Covid-19 do të mund të hyjnë në dyqane dhe institucione kulturore. Personat e pavaksinuar do të përballen gjithashtu me kufizime të reja kontakti. Një familje e pa vaksinuar do të jetë në gjendje të takojë vetëm dy persona nga një familje tjetër.
Udhëheqësit ranë dakord gjithashtu që baret dhe diskotekat do të duhet të mbyllen në zonat me më shumë se 350 raste të infektimit me koronavirus për 100,000 njerëz gjatë 7 ditëve. Ata gjithashtu do të vendosin frenime të reja për festat private në këto vende.
