Shqipëria ka shënuar një rënie të numrit të përgjithshëm të gjedhëve në vitin 2020, por edhe të prodhimit të produkteve blegtorale në tërësi.
Numri i gjedhëve në vitin 2020 ishte 362.583 krerë, duke shënuar rënie me 12,76 %, në krahasim me vitin 2019.
Përqendrimi më i madh i numrit të krerëve është në qarkun e Fierit me 16,15 % dhe në qarkun e Korçës me 10,87 % ndaj numrit gjithsej të gjedhëve.
Sa i përket prodhimeve blegtorale, gjatë vitit të parë të pandemisë, vendi ynë regjistroi rreth 150,000 tonë mish peshë e gjallë duke regjistruar një rënie në krahasim me vitin 2019 ku u regjistruan rreth 157.000 tonë. Ndërkohë sasia totale e qumështit të grumbulluar shënoi 1.052.000 litra ku sërish pati rënie në krahasim me vitin 2019 ku u regjistruan 1.112,000 litra.
Ndërkohë nga nënproduktet e qumështit, siç shihet nga statistikat e INSTAT, qumështi për konsum në tërësi shënoi një rënie prej 830.611 litrash. Rritje të sasisë së prodhimit kanë shënuar nënprodukte si qumështi i përpunuar, qumështi i pasterizuar, qumështi i skremuar, i acidifikuar, djathi nga qumështi i deles, apo edhe nënproduktet si gjiza dhe salca e kosit.
