Kryetarja e Lëvizjes Socialiste për Integrim, Monika Kryemadhi thotë se kjo forcë politike është e gatshme që të luftojë korrupsionin.
Në një takim me ambasadorin e ri të Italisë, Fabrizio Bucci, Kryemadhi shprehet se Italia është bërë shtëpi e dytë për mijëra shqiptarë, ndërsa shpjegon se LSI është e angazhuar për të përfunduar Reformën Zgjedhore dhe për të realizuar gjithë detyrimet e hapjes së negociatave me BE.
“Italia është bërë shtëpia e dytë për mijëra shqiptarë që kanë emigruar atje ndër vite. Dy popujt tanë ndajnë histori, vlera, tradita dhe miqësi për të cilën do punojmë së bashku me Ambasadorin Bucci që t’i forcojmë më tej. Italia është një partner strategjik i Shqipërisë, që i është gjendur pranë në ditë të vështira, e cila ka mbështetur proceset e demokratizimit dhe të konsolidimit të vendit si anëtar i NATO-s dhe është avokat për integrimin e saj në BE. I shpreha Ambasadorit Bucci angazhimin e plotë të LSI për të përfunduar sa më parë reformën zgjedhore dhe për të realizuar gjithë detyrimet e kushtet e hapjes së negociatave dhe integrimit të vendit në BE. LSI është e vendosur dhe vullnet-plotë për të realizuar me sukses reformat, që sjellin forcimin e demokracisë dhe shtetin e së drejtës, rrisin efikasitetin në luftën ndaj krimit të organizuar e korrupsionit, dhe zhvillojnë ekonominë për të garantuar mirëqenie dhe prosperitet për qytetarët. I shpreha Ambasadorit Bucci gatishmërinë e LSI për të çuar më tej marrëdhëniet shumëplanëshe të bashkëpunimit mes dy vendeve dhe për të forcuar miqësinë mes dy popujve tanë.” shkruan Kryemadhi.
