Gjiganti rus ”Gazprom” e ka konsideruar të nxituar rishitjen e gazit nga Gjermania në Poloni, në mes të çmimeve në rritje, duke hedhur poshtë akuzat se Moska kufizon vullnetarisht dërgesat e saj në Evropë.
“Ka një ndryshim të rrjedhës së gazit nga Gjermania në Poloni dhe me sa duket edhe në Ukrainë, prej tre deri në pesë milionë metra kub në ditë”, tha zëdhënësi i ”Gazprom”-it, Sergei Kuprianov.
“Ky gaz vjen nga rezervuarët nëntokësorë në Gjermani, rezervuarë prej të cilëve gazi është përdorur tashmë në 47%. Dhe dimri sapo ka filluar… Nuk është vendimi më racional”, theksoi ai.
Sipas tij, çmimet e këtyre dërgesave janë “dukshëm më të larta se ato të vëllimeve të dorëzuara nga Gazprom”.
Të mërkurën, përfaqësia e përhershme e Polonisë në Bashkimin Evropian akuzoi Moskën se kishte ndaluar furnizimet e saj përmes tubacionit të gazit ”Yamal-Evropë” midis Rusisë, Polonisë dhe Gjermanisë, duke akuzuar ”Gazprom”-in për “manipulim”.
Presidenti rus Vladimir Putin u përgjigj të enjten se ”Gazprom”-i nuk po kryente eksporte të reja nëpërmjet këtij gazsjellësi, për shkak të mungesës së porosive të reja evropiane.
Evropa Perëndimore është përballur prej disa muajsh me një rritje të çmendur të çmimeve të gazit për shkak të disa faktorëve, një dimër shumë i ftohtë 2020-2021, rimëkëmbja ekonomike pas pandemisë apo edhe një furnizim i reduktuar i energjive të rinovueshme.
Çmimi i gazit në Evropë theu një rekord të ri të martën, me ardhjen e temperaturave të dimrit.
Kësaj i shtohen tensionet gjeopolitike midis BE-së dhe Moskës, e cila siguron një të tretën e dërgesave evropiane.
Perëndimorët dyshojnë se Rusia ka kufizuar dërgesat e saj për të ushtruar presion mbi evropianët dhe për të arritur sukses në disa raste, duke përfshirë nisjen e gazsjellësit të ri ruso-gjerman, ”Nord Stream 2”.
“Akuzat kundër Rusisë dhe ‘Gazprom’-it që thonë se ne ofrojmë pak gaz në tregun evropian janë absolutisht të pabaza”, tha Kuprianov.
Rusia akuzohet gjithashtu se nuk dërgon gaz shtesë në Evropë përmes Ukrainës, për shkak të tensioneve të larta mes Moskës dhe Kievit, akuza të kundërshtuara edhe nga Moska.
