Koloneli Dritan Demiraj, që nga 2008 deri në 2013 ka mbajtur detyrën e komandantit të Forcave Speciale të Ushtrisë shqiptare e vlerëson si një lajm të madh vendimin e SHBA për të hapur në Shqipëri një bazë të forcave speciale të saj.
Demiraj tha në një intervistë për Zona Zero në Top News se përpjekjet për ta sjellë këtë zyrë në Shqipëri ka pasur ndër vite.
“Një përpjekje është bërë gjatë të gjithë kohës kur isha komandant i forcave speciale, por në atë kohë ishte vendosur në Kroaci, sepse bashkëpunimi mes SHBA dhe Kroacisë ishte më i ngushtë dhe Kroacia kishte edhe kapacitetet ushtarake, njerëzore e financiare më të larta se Shqipëria”, tha ai.
Por pse u zgjodh Shqipëria?
“Shqipëria është zgjedhur si një nga vendet partnere më të besueshme të SHBA, jo vetëm në fushën ushtarake, por edhe në fushën politike dhe më gjerë. Shqipëria është zgjedhur edhe sepse ofron vende të shkëlqyera stërvitjeje dhe kapacitetet e forcave speciale të shqipërisë janë në nivele të mira.”, shpjegoi Koloneli.
Ai tha se zyra që do të hapet përmban në vetvete forca speciale të të gjitha llojëve, që nga ato të operacioneve të fshehta në terren, deri te forcat speciale të trajnuara kundër krimit kibernetik.
Me transferimin e kësaj zyre, Demiraj paralajmëron qeverinë shqiptare se i shtohet përgjegjësia.
“Duhet ta kuptojë ministria dhe Kryeministri se duhet investuar te forcat speciale të Shqipërisë. Njësia e forcave speciale sot është e plakur. Duhet paga më të mira, që do të garantojnë një qasje tjetër për këtë forcë speciale”, u shpreh ai.
