Selia e Partisë Demokratike pritet të jetë në qendër të vëmendjes të shtunën e 8 janarit.
Nga brenda dhe në shkallët e saj janë hedhur akuza të forta gjëtë gjithë këtyre muajve, por protesta e thirrur nga Berisha pritet të vërë për herë të parë demokratët përballë njëri – tjetrit.
Një reflektim për këtë situatë duket se e ka bërë personi që nuk pritej.
Pëllumb Matraku, roja që qëndron në hyrje të selisë blu prej gati 24 vitesh ka vendosur të largohet. Arsyet i ka dhënë në një mesazh në Facebook.
“Kam punuar 24 vite në PD. Jam shumë krenar që kam punuar me profesor doktor Sali Berishën. Në 2 legjislaturat e fundit kam punuar me Lulzim Bashën. I jam shumë mirënjohës.
Sot (të mërkurën) bëra një largim para kohe sepse nuk më pëlqejnë disa reagime mes demokratësh. Bëni mirë të gjeni gjuhën, mos i bëni qejfin të tjerëve”, – shkruan Matraku.
