Ekzekutimi në Patos, veç një historie dashurie që çoi në këtë masakër, ka edhe një histori tjetër. Elisi, djali 22 vjeç që humbi jetën me kushëririn e tij, ishte vëlla binjak.
Ai bashkë me Kevin dhe të atin kishin pak kohë që ishin kthyer. Jetonin dhe punonin bashkë, kudo me të vëllanë. Por kthimi kësaj herë ishte fatal për të dhe gjithë familjen e tij. Ai humbi jetën me kushëririn teksa i doli në krah.
U vranë bashkë nga Martin Skendaj në një përpjekje për ta rrahur sërish. Edhe pse konflikti verbal ishte denoncuar, askush nuk ndërhyri ta parandalonte atë masakër.
Por, Martin Skendaj ka dalë sot para gjykatës. Nuk ka folur, vetëm ka pohuar.
Masa
Gjykata e Shkallës së Parë e rrethit gjyqësor, Fier, ka vendosur si masë sigurie “Arrest me burg”’ ndaj ish-gardianit të burgut Martin Skendaj. Ai u akuzua për vrasjen me pasojë vdekjen e shtetasve Manol Rrapaj nga Kuqari dhe Elis Kapajt nga Kashishti.
I sjellë nën masa të rrepta sigurie, në ambientet e godinës së gjykatës, nga toga e shoqërimit, përforcuar edhe nga forca të tjera të rendit, i akuzuari u përball me akuzën e rëndë të vrasjes.
Akuza u formular nga prokurori Çlirim Sina. Seanca u drejtua nga gjyqtare Adelina Zarka, ndërsa palë mbrojtëse ishte caktuar kryesisht nga gjykata.
Në sallën e gjykimit, i akuzuari nuk ka folur. Ai ka qëndruar në heshtje brenda hekurave, në vendqëndrimin e të akuzuarve. Ndërsa e vetmja frazë e dalë nga goja e tij ka qenë folja; ” e bëra”, duke pranuar kështu akuzën e ngritur nga hetimi.
Seanca është mbajtur pa praninë e medies dhe të personave të tjerë, për shkak të natyrës së veprës penale. I akuzuari është njohur me akuzën, dhe me vendimin e gjykatës. ‘Arrest me burg’ deri në përfundimin e hetimit gjyqësor, ka qenë vendimi i firmosur nga drejtuesja e seancës.
I shoqëruar nga forcat e sigurisë ai ka dalë kokulur nga dera e godinës së gjyqësorit.
Aty dëgjohej vetëm zhurma e dyerve të godinës, ajo e këpucëve të efektivëve blu dhe zhurma e derës së automjetit. Mjeti e solli dhe e rimori sërish ish- efektivin e policisë së burgut, tashmë prej datës 19 dhjetor i akuzuar për vrasjen e dy të rinjve!
Ngjarja
Ngjarja e rëndë ka ndodhur rreth orës 12. 20 në mjediset e brendshme të Poliklinikës së Patosit. Shtetasi Martin Skendaj, 22 vjeç, tashmë nën akuzë, kishte shkuar brenda në qendër shëndetësore.
Dy ditë më parë të tre shtetasit, viktimat dhe autori ishin përfshirë në një sherr mes tyre. Si pasojë e sherrit ishte kryer edhe një denoncim në organet e rendit nga autori i dyshuari.
Ditën e krimit brenda mjediseve të poliklinikës, sherri është rindezur sërish. Pasi kanë debatuar sërish verbalisht, janë përfshirë në konflikt fizik. I riu, Skendaj, ka nxjerrë armën dhe ka qëlluar në drejtim të Rapajt, si dhe kushëririt të tij, Elis Kapaj.
Ky i fundit humbi jetën në vendngjarje, ndërsa Rrapaj pak minuta më vonë në spitalin e Fierit.
Ditën e djeshme viktimat janë përcjellë për në banesën e fundit. Në familjen Kapaj në Kashisht, dhjetëra bashkëfshatarë të Elisit dhe familjarë të tij kanë përcjellë arkëmortin me trupin e të riut në varrezat e fshatit.
Viktima ishte binjak me Kevin dhe la pas edhe dy motra të martuara. Ndërsa ishte kthyer para disa kohësh së bashku me vëllanë dhe babanë nga emigrimi! /Fjala.al/
