Në 6 bashkitë e vendit ku u zhvilluan zgjedhjet lokale vijon numërimi i kutive për të vendosur se kush do të jetë në krye të tyre.
Teksa në Vorë dhe në Rogozhinë kandidatët e Partisë Socialiste u shpallën fitues, të majtët po kryesojnë dhe në Dibër, Durrës dhe Lushnjë.
Më saktësisht, në Dibër janë numëruar 45 nga 101 kuti, ku Rahim spahiu i PS kryeson me 7,556 vota, i ndjekur nga Premtim Kryemadhi i koalicionit “Shtëpia e Lirisë” me 2,310 vota. Kandidati i PD, Luan Haka është i treti me 1,965 vota dhe Dritan Torba i LRE i 4 me 45 vota.
Në Durrës, 181 kuti janë numëruar nga 337, dhe Emirjana Sako kryeson me 20,755 vota e ndjekur nga Ardian Muka i “Shtëpisë së Lirisë” me 10,379 vota, teksa sërish kandidati i PD, Luan Hoti është i treti me 4,784 vota.
Në Lushnjë me 126 kuti të numëruara nga 157, Eriselda Sefa e PS kryeson me 16,395 vota. Elton Bano i “Shtëpisë së Lirisë” renditet i dyti me 9,014 vota, i ndjekur nga Indrit Sefa i PD me 3,043 vota.
Shkodra nga ana tjetër kryesohet nga kandidati i koalicionit Berisha-Meta, Bardh Spahia me një diferencë të vogël me kandidaten e PS, Majlinda Angoni. Teksa janë numëruar 148 nga 250 kuti, Spahia ka marrë 12,740 vota ndërsa Angoni 11,339 vota. Edhe në këtë bashki, kandidati i Partisë Demokratike, Xhemal Bushati renditet i treti me 4,510 vota.
Numërimi për 4 bashkitë e mbetura pritet të përfundojë ditën e sotme para orës 22:00, duke përcaktuar kështu dhe kryetarët.
