Andrei Kozyrev, një ish-ministër i jashtëm rus ka shpjeguar pse beson se presidenti rus nuk do të përdorë armë bërthamore kundër Perëndimit. Në një postim në Twitter, ai tha se Putin është një person “racional” dhe se pushtimi i Ukrainës – megjithëse “i tmerrshëm” – nuk është “irracional”.
Kjo për tre arsye, tha ai: Zoti Putin beson se Ukraina nuk është një komb i vërtetë. “Nëse qeveria e Ukrainës nuk mund të mbahet e pavarur dhe pro-Kremlinit në mënyrë të fshehtë, siç ka konstatuar ai, atëherë ai do ta detyrojë haptazi të jetë”, tha Kozyrev.
Ndërsa Kremlini kaloi 20 vitet e fundit duke u përpjekur të modernizonte ushtrinë e tij, Kozyrev tha se shumë nga paratë ishin vjedhur dhe shpenzuar në mega-jahte në Qipro – por këshilltarët ushtarakë mendonin se nuk mund t’ia raportonin këtë gjë zotit Putin.
Ish-ministri i Jashtëm argumentoi gjithashtu se liderët e Rusisë kanë filluar të besojnë propagandën e tyre se Perëndimi është i dobët, duke përfshirë se presidenti i SHBA Joe Biden është “i paaftë mendërisht”.
“Pra, për mendimin tim, ai është racional,” tha z. Kozyrev. “Duke pasur parasysh se ai është racional, besoj fuqishëm se nuk do të përdorë qëllimisht armë bërthamore kundër Perëndimit.
“Unë them qëllimisht sepse granatimet pa dallim pranë një termocentrali bërthamor mund të shkaktojnë një katastrofë të paqëllimshme bërthamore në Ukrainë.”
