Ata tashmë janë reduktuar në 8 persona dhe do të vijojnë garimin përgjatë ditëve në vazhdim. Garimi tashmë është në një fazë specifike që lidhet me dinjitetin dhe karakterin e secilit prej personave që do të vendoset për të drejtuar atë që konsiderohet edhe si FBI-ja jonë.
Nesër deri ditën e premte do të zhvillohet faza e testimit me makinën e së vërtetës (poligrafin) për 8 të kualifikuarit për drejtues të Byrosë Kombëtare të Hetimit. Seancat do të zhvillohen pranë SHÇBA-së tek ministria e Brendshme dhe do të zgjasin nga 2 deri në 4 orë për çdo kandidat. Testimi mbyllet të premten dhe më pas SPAK-u do të përzgjedhë një nga tetë garuesit për t’ia përcjellë Këshillit të Lartë të Prokurorisë për ta emëruar kreun e ri të BKH-së. Sipas ligjit kreun e BKH-së e zgjedh Këshilli i Lartë i Prokurorisë, pasi të kenë përfunduar të gjitha testimet që janë përcaktuar për tu kryer.
Janë zyrtarët e BKH-së që hedhin dritë mbi faktin se çfarë do të thotë kjo fazë e re në të cilën do të kalojnë garuesit, që tashmë kanë rënë në 8 persona. Sipas të dhënave makina e së vërtetës bazohet mbi faktin se gënjeshtra provokon përgjithësisht ankth, që nga ana e tij modifikon parametrat fiziologjike, si presioni i gjakut, frekuenca kardiake, ritmi i frymëmarrjes e deri tek rezistenca e ndryshuar e lëkurës ndaj përcjelljes se rrymës elektrike.
Që në vitin 1913 është ndërtuar një makine e tillë, e cila ishte në gjendje që të gjitha këto parametra t’i përmblidhte në një raport grafik. Makina e të vërtetës, përdoret nga FBI-ja gjatë marrjes në staf të punonjësve të rinj, por edhe gjatë pyetjes së dëshmitarëve, për çështje tepër delikate.
Lista e 8 kandidateve te kualifikuar
1-Aida Veizaj (Hanaj)
2-Ardian Çipa
3-Artur Beu
4-Ervin Hodaj
5-Gentjan Shehaj
6-Lindita Nushi
7-Idajet Faskaj
8-Ylli Pjetërnikaj
