Deklarata e ish-kryeministri Sali Berisha 2 ditë më parë se kishte refuzuar oferta marramendëse nga GAZPROM për të mos pranuar projektin e TAP-it në Shqipëri, solli reagime të shumta. MEs tyre ishte edhe reagimi i ambasadës ruse në Shqipëri, e cila iu përgjigj ish-kryeministrit Berisha me ironi duke thënë se “sa e madhe ishte shuma e parave që kishte kërkuar, dhe që Gazprom nuk kishte mundur t’ia plotësonte”.
Ndërkohë, për këtë çështje ka ardhur edhe reagimi i ish-drejtorit të Albpetrolit në kohën kur do të fillonte investimi i TAP-it në Shqipëri, Pajtim Sula. Në një koment të lënë në rrjetet sociale, ai thotë se ka pritur në zyra përfaqësuesit e Gazprom me porosi të Berishës, por oferta e rusëve ishte shumë qesharake. Sipas tij, amerikanët e dinin që Sali Berisha po punonte me rusët.
“Që Berisha mbante kontakt me Gazpromin kjo është shume e saktë! Me porosi të Berishës, unë kam pritur në zyrë (Albpetrol) përfaqësuesit e Gazprom për privatizimin e Albpetrolit! Bile dhanë dhe një ofertë qesharake zyrtarisht, pasi e kuptuan që nuk çanë dot, por amerikanet e dinin që Berisha po punonte me rusët”, shkruan Pajtim Sula.
