Ka nisur me debate mbledhja e Grupit Parlamentar në Selinë e Partisë Demokratike.
Raportohet se në këtë mbledhje janë të pranishëm edhe të gjithë deputetët që u shkarkuan nga ish-kryetari i PD-së Lulzim Basha. E ndërkohë ashtu siç paralajmëroi dje, i pranishëm në këtë mbledhje është edhe lideri historik i kësaj partie, Sali Berisha. Kujtojmë se Berisha u përjashtua nga grupi më 9 shtator me vendim të Bashës, duke argumentuar se kjo ka ardhur për shkak të shpalljes së tij “non grata”. Kjo lëvizje solli edhe përçarjet e mëdha brenda PD.
Në mbledhje mungon ish-kryetari i partisë, Lulzim Basha, ndërsa kjo është mbledhja e parë e Grupit që pas vendimit të gjykatës që i dha drejtimin e PD Grupit të Rithemelimit.
Mesohet se Enkeljed Alibeaj ka pasur debate me Sali Berishën në mbledhje. Alibeaj i ka thënë Berishës se prezenca e tij është një sinjal i brishtë për demokracinë.
Alibeaj: Prezenca juaj në këtë sallë është një sinjal i brishtë për demokracinë e brendshme në parti. Z.Berisha me prezencën tuaj ju po zhvlerësoni vendimet e organeve të kësaj partie. Ju jeni i përjashtuar nga grupi parlamentar dhe çdo forum.
Berisha: Z.Alibeaj më vjen keq për këtë qëndrim, pasi jua kam thënë edhe pak ditë më parë dhe po jua përsëris, unë ju respektoj si kryetar grupi, por çdo organ vendimarrës në këtë parti ka qenë ilegjitime pas 11 dhjetorit. I vetmi organ që merr vendime është Komisioni i Rithemelimit.
