Policia ende nuk ka gjetur trupin e Jan Prengës, i cili u mor peng ditën e 17 janarit në Kamzë nga grupet e trafikut të drogës. Por, para se të merrej peng, Jan Prenga është shfaqur në orët e para të mëngjesit të 17 janarit në një lokal së bashku me një grua.
Fotot e dala ditën e sotme, tregojnë Prengën i cili është parë në një lokal së bashku me një grua në lagjen ku banonte në Kamzë. Së bashku me gruan ai ngrihet dhe largohen nga lokali.
Ky ka qenë dhe momenti i fundit, kur Prenga është parë në lagjen ku banonte, pasi më pas ai është rrëmbyer në rrugën “London”, prej ku është torturuar deri në vdekje e më pas është zhdukur, ndërsa nuk është gjetur ende trupi i tij.
Sipas policisë, Jan Prenga u rrëmbye nga grupet e trafikut të drogës të cilat e futën forcërisht në një “Range Over” të vjedhur. Prenga ka mbërritur i vdekur në bodrumin e resorit “Golden”, në Shijak. Për këtë ngjarje një pjesë e grupit të rrëmbyesve janë arrestuar ndërsa janë shpallur në kërkim Gentian Doçi, Altin Hajri dhe Dritan Rexhepi.
Të tre këta persona rezultojnë emra të njohur për drejtësinë, pasi Doçi është pjesë e një prej bandave të Shkodrës, Hajri është pronar i resortit luksoz “Golden”, ku u mor peng Prenga, ndërsa Rexhepi është i burgosur në Ekuador për trafik ndërkombëtar droge. Ky i fundit dyshohet se ka dhënë dhe urdhrin për vrasjen e 49-vjeçarit edhe pse ai e ka mohuar të ketë gisht për një ngjarje të tillë.
