Nga Emili Bibolli
Eshte zhgenjyes fakti që vazhdojnë shfaqjet demode me asamble dhe kuvende kombëtare dhe që partitë politike shqiptare vazhdojnë të bëjnë hapa pas.
Nga njëra anë e medaljes së ndryshkur 30 vjeçare kemi të ashtuquajturën opozitë shqiptare e cila po jep shpirt në duart e një doktori, që fatkeqësisht e ka ndarë mendjen për ta nxjerrë pacientin të vdekur nga operacioni.
Figura të vjetra, disa pa integritet, disa të paafta për të bërë politikë e disa besnike vetëm ndaj urdhërave të z.Berisha bashkohen në një pikë. Të gjitha këto nuk prodhojnë dot diçka ndryshe, qoftë ide, qoftë alternativa të reja, qoftë frymë, vazhdojnë të shkatërrojnë sistemin e vlerave dhe të meritokracisë dhe vetëm enden lart e poshtë nëpër ekrane televizive duke ngatërruar të bërit opozitë me replikat degraduese dhe alogjike.
Në anën tjetër të po së njëjtës medalje qëndron forca më progresiste e politikës shqiptare, siç u nënkuptua nga lavdet e thurrura gjatë asamblesë së djeshme nga kryeministri ynë. Sigurisht, një shfaqje kjo e tepruar komike të cilën do ta kishte patur zili edhe Roberto Benigni. Kur një forcë politike dallon nga gjithë të tjerat dhe ka në fokus mirëqënien e vendit dhe të popullit, janë veprat ato që flasin, jo fjalimet. I takon vetëm popullit shqiptar ti vendosë notën qeverisë, apo veprave të saj sepse qeveritë janë të zgjedhurat, sovrani është zgjedhësi. Ai fatkeqësisht sot mbetet i detyruar të votojë të keqen më të vogël dhe jo të mirën më të madhe.
E si të mos mjaftojnë këto, kryeministri shfrytëzon një mbledhje partie për të sulmuar SPAK. Revoltohet kur e akuzojnë kundërshtarët se ndërhyn tek çështjet e drejtësisë dhe më pas bën ekzaktësisht atë që nuk duhet të bëjë, ndërhyn dhe arrin deri aty sa i kërkon edhe llogari kësaj strukture përse heton A-në, duke bërë njëkohësisht dhe avokatin mbrojtës, dhe nuk heton ZH-në. Askush nuk ka të drejtë të ndërhyjë tek çështjet e drejtësisë, përfshirë dhe Kryeministri.
Jemi afër zgjedhjeve bashkiake dhe partitë tona politike si zakonisht fillojnë me cic-micet e tyre të përhershme.
Ndërkohë që duhet të ketë angazhim për vlerësimin e punës së kryebashkiakëve në të 61 bashkitë, për të kuptuar se kush i ka shërbyer popullit gjatë mandatit, çfarë ka bërë e ka arritur, çfarë duhet të bëhet më mirë e çfarë mësimesh janë nxjerrë, politikanet tanë vazhdojnë të jenë të fokusuar disa tek lufta e brendshme, disa tek presidenti i ardhshëm e disa nuk janë zgjuar akoma nga gjumi.
Posacerisht per fjala.al
