Edi Paloka, nënkryetar i Partisë Demokratike, ka zbuluar se partnerët ndërkombëtarë të Shqipërisë i kanë premtuar opozitës zgjedhje të parakohshme. Në intervistën në studion e Ilva Now, në Euroneës Albania, Paloka theksoi se me përfundimin e reformës zgjedhore, ndërkombëtarët do i kërkojnë kryeministrit Edi Rama zgjedhje të parakohshme.
“Që të jemi të qartë; tryeza është e përcaktuar jo vetëm nga ne, por edhe nga Bundestagu. Ka qenë i vetmi kusht ku përfshihej edhe opozita; ishte ulja në një tryezë për kodin zgjedhor. Ne kemi dhënë fjalën tek partnerët tanë se këtë kusht do ta realizojmë, siç na është dhënë fjala nga partnerët do të ecet me hapat e tjerë, me 9 kushtet e Bundestagut që mbështeten edhe nga SHBA dhe BE. Hapi tjetër është me realizimin e reformës është implementimi i reformës, që do të thotë zgjedhje”, – tha Paloka.
Teksa komentoi deklaratën e bërë sot nga Presidenti i Republikës i cili foli për grusht shtetit dhe ftoi popullin në shesh më 2 mars, nënkryetari i PD u shpreh se ndryshimi i ligjit për betimin e anëtarëve të Gjykatës Kushtetuese nuk është fillimi i grushtit të shtetit, por thellimi tij, pasi grushti i shtetit sipas Palokës, ka nisur me reformë në drejtësi dhe 7 ligjet.
Teksa nuk preferoi të zbulonte skenarin që do të ndjekë opozita pas takimit të një dite më parë mes krydemokratit Lulzim Basha dhe Presidentit Ilir Meta, Paloka u shpreh se opozita do të jetë në krah të presidentit në mbrojtje të Kushtetutës. Por pa hequr dorë nga përpjekja për zgjidhje institucionale në tryezën për reformën zgjedhore, e cila siç ritheksoi është një fjalë e dhënë partnerëve, por edhe një premtim i marrë prej tyre se pas miratimit të saj kryeministri do të detyrohet nga ndërkombëtarët për të zhvilluar zgjedhje të parakohshme.
