Një 21-vjeçar është i pandehuri në gjyqin e parë për krimet e luftës që ushtria ruse ka kryer në Ukrainë.
Gjyqi po mbahet në Kiev, dhe Vadim Shishimarin akuzohet për vrasjen e një civili të paarmatosur në ditët e para të luftës. Nëse akuzat vërtetohen, atëherë djaloshi do kalojë pjesën tjetër të jetës në burg, pasi rrezikon dënimin e përjetshëm. Sipas BBC, Prokurorët thonë se Shishimarin po ngiste një automjet të vjedhur dhe aty ka vrarë një burrë 62-vjeçar ukrainas që po lëvizte me biçikletë.
“Me këtë gjyq të parë, ne po dërgojmë një sinjal të qartë se çdo autor, çdo person që urdhëroi ose ndihmoi në kryerjen e krimeve në Ukrainë nuk do të shmangë përgjegjësinë,” tha prokurorja e përgjithshme ukrainase, Iryna Venediktova.
Rusia i ka mohuar gjatë gjithë kohës akuzat për kryerjen e krimeve të luftës në Ukraina, ndërsa deri më tani mijëra civilë kanë humbur jetën. Përveç varreve të shumtë masivë të gjetur në të gjitha zonat ku ka pasur civilë, rasti më i rëndë ishte Bucha, qyteti ku trupat e rreth 400 civilëve u gjetën në mes të rrugëve pasi ushtria ruse u largua.
