Ish-presidenti Bujar Nishani humbi jetën ditën e djeshme pasi ishte dërguar për kurim në Gjermani.
Trupi i ish-presidentit pritet të mbërrijë në atdhe ditën e martë, ndërsa mësohet se stafi mjekësor në Spitalin Universitar të Berlinit Charite, dhe të afërmit e të ndjerit po merren me procedurat e posaçme që mundësojnë këtë gjë.
Mësohet se procedurat mund të përfundojnë gjatë ditës së hënë dhe po të hënën rreth mbrëmjes trupi i tij do të niset drejt Tiranës dhe do të mbërrijë gjatë ditës së martë. Ish-Presidenti do të përcillet për në banesën e fundit nëpërmjet një ceremonie zyrtare.
Për këtë, Këshilli i Ministrave pritet të marrë një vendim të posaçëm, për t’i bërë ish-kreut të shtetit nderimet e duhura.
Bujar Nishani ndërroi jetë teksa po kurohej në spitalin universitar Charite në Berlin, një ndër spitalet më të njohur në Gjermani, por shëndeti i tij u përkeqësua për shkak të insuficiencës polmonare të theksuar, çka solli dhe vdekjen e tij të shtunën.
