Marrëveshja e arritur mes Rusisë dhe Serbisë për blerjen e gazit më lirë se vendet e tjera nga kjo e fundit ka ngjallur reagime në Kosovë.
Me anë të një postimi në Facebook, shefi i kabinetit në Presidencë, Blerim Vela ngre pyetjen se deri kur do të tolerojë Bashkimi Eurpian bashkëpunimin e Serbisë me Rusinë, edhe pse Perëndimi po ‘lufton’ me sanksione Moskën, pas nisjes së luftës në Ukrainë.
“Putin dhe Vuçiç u pajtuan në një telefonatë sot që Rusia të vazhdojë të furnizojë Serbinë me gaz natyral dhe dy vendet do të vazhdojnë të përforcojnë partneritetin e tyre. Serbia, një vend kandidat i BE-së, në vend se të përafrojë sanksionet me BE-në thellon bashkëpunimin me Rusinë. Deri kur BE-ja do ta tolerojë këtë?”, ka shkruar Vela.
Vuçiç njoftoi ditën e sotme se pas një bisede të zhvilluar me homologun e tij Vladimir Putin, kishte arritur një marrëveshje me Rusinë për ta blerë gazin rus me çmim shumë më të ulët se vendet e tjera të Evropës.
Kujtojmë se Serbia është i vetmi vend në Evropë që nuk i është bashkuar vendosjes së sanksioneve Moskës zyrtare për nisjen e luftës.
