Komisioni i Ligjeve me shumicë votash ka vendosur që të çojë emrin e Bajram Begajt në Kuvend si kandidat për President. Ai do t’i nënshtrohet votimit të deputetëve në sallën e Kuvendit, ndërsa u propozua nga 37 ligjvënës socialistë.
Opozita do të votojë kundër propozimit për president nga socialistët për Bajram Begajn. I pranishëm në Komisionin e Ligjeve për emrin e ri të Presidentit, deputeti Oerd Bylykbashi ka argumentuar se një ushtarak aktiv në detyrë, është në kundërshtim me Kushtetutën për të dalë kandidat për President.
“Ushtarakët nuk mund të ushtrojnë profesione se është anti kushtetues. Për rrjedhojë e bën me ves. Këtë kandidaturë e bën me ves. Dhe procesin e votimit në seancën plenare.” tha Bylykbashi.
Gjeneralmajor Bajram Begaj, i cili mbante postin e Shefit të Shtabit të Përgjithshëm të Forcave të Armatosura të Shqipërisë, është kandidati për President i Shqipërisë, i propozuar nga partia në pushtet, Partia Socialiste. Ai u lirua nga detyra me një dekret të firmosur nga Presidenti aktual Ilir Meta. Megjithatë për Bylykbashin kjo nuk e zhbën të qënit vendim në kundërshtim me Kushtetutën.
“Mundet që ta kishit bërë krejt ndryshe. Po e fusni në ves Kushtetues zgjedhjen e Presidentit. Është e panevojshme që të ketë një njollë të tillë. Është zgjedhja që u ka bërë kryeministri edhe të vendosni 37 firma ende pa e ditur se kush është kandidati.”
Sipas Bylykbashit në momentin që është dorëzuar kandidatura, Begaj ka qenë në detyrë dhe në kundërshtim me Kushtetutën.
“Dekreti i nxjerrë në momentin e fundit nuk e shëndosh, këtë anti kushtetueshmëri. Parimi është që ushtarakët e shërbimit aktiv nuk mund të ushtrojnë. Ai është gjeneral dhe thoni ka dekret. Deri tani ka qenë oficeri më i lartë i shërbimit ushtarak. Po e çoni në antikushtetueshmëri. Ne e votojmë kundër këtë kandidat. Se po bëni kapjen finale të të gjitha pushteteve të Republikës.” tha Bylykbashi.
Një përgjigje për Bylykbashin ka ardhur nga Klotilda Bushka, e cila përmendi dekretin e Presidentit Meta.
Bushka: Mund ta kishit kursyer analizën. Se si pas nenit ushtaraku nuk mund të zgjidhet por me dekret të Presidentit, kandidati Begaj i propozuar nga 37 deputetët të PS është liruar nga detyra dhe është nxjerrë në lirim. Dekreti ka hyrë në fuqi menjëherë.”
Pas votimit në Komision, me shumicë votash u vendos që emri i Gjeneralmajor Bajram Begaj të kalojë për votim në Kuvend.
