Merkato e klubeve kryesore evropiane ka hyrë në fazën më të nxehtë të saj, ku priten shumë afrime dhe largime nga skuadrat e mëdha. E pikërisht këto lëvizje janë në fokusin kryesor të mediave më të njohur sportive.
Më poshtë titujt kryesorë të tyre:
“SPORT” hapet me merkaton e Barcelonës dhe një nga emrat që ka mbajtur pezull zhvillimet në klub. “Dembele, vendimi final”, është titulli i gazetës sportive, me futbollistin francez që pritet nga momenti në moment të bëjë të ditur të ardhmen e tij.
Edhe “Mundo Deportivo” gjithashtu ka në fokus merkaton e katalanasve ku si titull kryesor mban: “Lewandowski, 60 mln euro”, që është dhe shifra që Bayern pretendon të përfitojë nga sulmuesi polak.
“L’Esportiu” i kushton faqen e parë afrimit të klubit katalanas, Pablo Torre me titullin: “Kapërcimi i madh”.
“Akoma më e vështirë” është titulli kryesor i “AS” që flet për rivalitetin e shtuar në Champions League pas përforcimit të skuadrave si Bayern, City, PSG, Liverpool e Dortmund me blerje respektive si Mane, Haaland, Mbappe (qëndrimi në skuadër), Darëin Nunez e Sebastian Haller.
“Fuqi afrikane” është titulli i “Marca”, që i kushton faqen e parë organikës së Real Madrid me emra si Alaba, Tchouameni, Mendy, Rudiger, Camavinga, por edhe Karim Benzema.
“E paimagjinueshme, Nadal është pas” shkruan në faqen e parë “L’Equipe” që flet për fituesit e mundshëm të Wimbledon, ku tenisti serb Novak Djokovic mbetet favoriti kryesor.
Në fokusin dhe faqet e para të gazetave italiane mbizotëron merkato e Juventusit dhe kryesisht Angel Di Maria.
“Di Maria: Juve ja ku jam” është titulli i “La Gazzeta dello Sport” , e cila i kushton faqen e parë akordit të argjentinasit me klubin bardhezi.
Të njëjtin fokus ka edhe “Corriere dello Sport”, e cila madje ka thuajse të njëjtin titull: “Di Maria, ja ku jemi”.
Edhe “Tuttosport”, si zakonisht i kushton faqen e parë merkatos së bianconerëve por në fokusin e saj është De Ligt dhe shifra që Juve dëshiron për ta shitur: “De Ligt? Duam 100 milionë”, është titulli i të përditshmes torineze.
