Silva Bino, shefja e departamentit të sëmundjeve infektive në Institutin e Shëndetit Publik, ka dalë në një konferencë për mediat për të dhënë detaje mbi masat e marra për përballjen me raste të mundshme të coronavirusit në Shqipëri. Bino theksoi se nuk ka vend për panik në vendin tonë dhe se autoritetet janë përgatitur dhe kanë marrë të gjitha masat e nevojshme.
Doktoresha e ISHP-së bëri me dije se Shqipëria ka pajisje që “e identifikon coronavirusin në vend”.
“Nuk është vetëm një pajisje, por janë disa pajisje që ndihmojnë njëra-tjetrën. Nuk është vetëm një pajisje që po u prish, nuk kemi tjetër, jemi të pajisur që të bëjmë identifikimin në vend siç ndodh në Itali apo shtete të tjera”, tha Bino.
Silva Bino bëri një thirrje për mediat dhe të gjithë qytetarët që të kenë më shumë besim te autoritetet pasi janë të përgatitura.
“Janë përforcuar masat në kufi”, tha ajo, duke shtuar se në aeroportin e Rinasit ndodhet aktualisht struktura e specializuar dhe është përforcuar personeli.
“U bëj thirrje qytetarëve që udhëtojnë nga vende si Italia dhe Kina, të jenë të kujdesshëm dhe të raportojnë çdo shqetësim shëndetësor”, tha Bino.
Shqipëria është një vend që ka një eksperiencë shumë të mirë të gjurmimit të kontakteve, siguroi doktoresha e ISHP-së.
Sa i përket karantinës, Bino tha se është përzgjedhur zona dhe strukturat e posaçme, por nuk tregoi vendndodhjen për të mos hapur panik te banorët.
Sa i përket personave që mendojnë se janë prekur nga koronavirusin, ata mund të telefonojnë në numrin 127, por Bino kërkoi kujdes sepse Shqipëria ndodhet në sezon gripi dhe jo çdo simptomë duhet të ngrejë frikën për prekje nga koronavirus.
Emrat/ Këto janë 11 komunat italiane që coronavirusi i ka kthyer në karantinë
