Një aksident i rëndë është regjistruar pasditen e sotme në aksin Librazhd-Elbasan, në vendin e njohur si “Kthesa e Murrashit”.
Një kamion i tonazhit të rëndë është përfshirë në një aksident masiv, ku të paktën shtatë autovetura janë përplasur me njëra-tjetrën dhe për pasojë, është bllokuar qarkullimi.
Burime nga vendngjarja bënë me dije se kamioni që qarkullonte nga Librazhdi në drejtim të Elbasanit, gjatë një manovre të gabuar në tentativë për parakalim, është përplasur me një makinë, gjë që ka shkaktuar më pas përplasjen në varg.
Tre makina kanë pësuar dëmtime serioze, ndërsa katër të tjera dëmtime të vogla. Mësohet se një grua ka mbetur e dëmtuar nga përplasja.
Tre ditë më parë, në të njëjtin vend u përplasen dy autovetura dhe një furgon që tranportonte udhëtarë.
