Eksperti i sigurisë Fatjon Softa thotë se sistemi TIMS është porta kryesore e vendit.
Në një intervistë për Euronews Albania Softa shpjegoi se përmes sulmit kibernetik në sistemin TIMS, hakerat kanë në dorë informacione rreth hyrje-daljeve konfidenciale për persona të ndryshëm, të cilat mund t’i përdorin për interesat e tyre.
“Është regjistri i hyrje-daljeve, është porta kryesore e vendit. Gjithçka evidentohet, që hyrja e politikanëve, diplomatëve, persona nën hetim. Ata tani kanë informacione për këta persona që hyjnë e dalin në vend që mund t’i përdorin për interesat e tyre”, tha eksperti.
Ndër të tjera Softa tha se sulmet kibernetike duhet të merren në konsideratë nga autoritetet në mënyrë që të rritet niveli i sigurisë në vend.
“Shqipëria ka investuar shumë në infrastrukturën digjitale. Ky nuk është vetëm fillimi i sulmeve iraniane të infrastrukturës së sigurisë së Shqipërisë. Mendoj se do ketë edhe rreziqe të tjera që duhet të merren në konsideratë për të rritur nivelin e sigurisë në vend.
Kryeministri Edi Rama njoftoi mëngjesin e së shtunës se hakerat iranianë kanë sulmuar sistemin TIMS.
