Kryeministri i Kosovës, Albin Kurti akuzon presidentin e vendit, Hashim Thaçi, se ka nënshkruar një marrëveshje ndërkombëtare që ndalon hyrjen e Forcave të Sigurisë në veri të Kosovës. Bëhet fjalë për një marrëveshje sekrete të vitit 2013-të midis Thaçit në pozitën e kryeministrit dhe ish-sekretarit të atëhershëm të NATO-s, Anders Fogh Rasmussen.
Kurti deklaroi se në letrat që i janë vënë në dispozicion nga një zyrtar i NATO-s, aty është shpikur edhe termi “Kosova e Veriut”. Sipas kryeministrit, kjo tregon se asosacioni i komunave serbe dhe ideja e shkëmbimit të territoreve është e njëjta gjë.
Kurti theksoi se marrëveshja ndërkombëtare duhej të miratohej nga Parlamenti, por kjo nuk ka ndodhur. Aty bëhet me dije se FSK duhet të marrë dakordësinë e KFOR-it përpara se të shkojë në veri të vendit.
Për marrëveshjen, Kurti ka njoftuar kryetaren e Kuvendit, Vjosa Osmani, dhe kryeprokurorin e shtetit.
I pyetur nëse Thaçi duhet të shkarkohet nga detyra, Albin Kurti tha se këtë vendim do ta marrin deputetët.
