Nga Emili Bibolli
Nuk njohin limite kur vjen puna tek pushteti apo për të shpëtuar veten, zombi të uritur që kafshojnë këdo që të munden, madje dhe ata që dje u kanë shtrënguar duart apo kanë drekuar në skutat e vilave të tyre.
Thirrje për të përdorur gjuhën e forcës, thirrje për protesta të dhunshme, fjalor banal dhe etiketime të turpshme, përdorimi i një fëmije të ndjerë të aksidentuar, të korruptuar që bërtasin kapeni të korruptuarin, marifetçinj me duart në xhepat e qytetarëve shqiptarë dhe që hidhen sa majtas sa djathtas.
Dy politikanë qesharakë, binjakë me njëri-tjetrin, me një karrierë politike të zezë 32 vjeçare që nuk kanë lënë antivlerë të mundshme pa e promovuar si vlerë zotohen se do bëjnë revolucion për të “shpëtuar” Shqipërinë.
E vetmja gjë që po arrijnë dhe do arrijnë është mbajtja peng e lindjes së një opozite solide dhe të vërtetë, e cila i duhet vendit sepse garanton një demokraci të shëndetshme dhe jo vetëm.
E gjithë kjo situatë, me politikën e përbaltjes, dhunës, çnjerëzores, cinizmit, makutërisë e hipokrizisë po e gangrenizon këtë vend çdo ditë e më shumë dhe bashkë me të dhe të ardhmen e shqiptarëve.
