Të paktën 23 persona kanë humbur jetën këtë javë në Indi, pas nisjes së protestave të dhunshme kundër ligjit të ri të nënshtetësisë, të miratuar nga qeveria indiane. Sipas kritikëve të ligjit të ri të nënshtetësisë, ky amendament i shtuar diskriminon popullsinë myslimane.
Por kreu i qeverisë, anëtar i partisë nacionaliste hindu, Partia e Popullit Indian (Bharatiya Janata Party), Narendra Modi, thotë se, asgjë nuk ka ndryshuar për 1,3 miliardë indianët pas miratimit të këtij ligji.
Gjatë një takimi të zhvilluar të dielën, kryeministri Modi ka kundërshtuar kategorikisht akuzat se ligji i ri i nënshtetësisë indiane, i miratuar nga qeveria që ai drejton, është anti-islamik. Sipas tij janë partitë opozitare që kanë shtrembëruar faktet për të dobësuar qeverinë legjitime indiane.
“Ligji i ri i nënshtetësisë nuk ka asnjë impakt për popullin indian, dhe siguroj indianët myslimanë se asgjë nuk do të ndryshojë për ata. Ne asnjëherë nuk kemi pyetur shtetasit indian nëse frekuentojnë tempuj të ndryshëm apo xhami, kur zbatojmë skemat tona të ndihmës sociale”,- u shpreh kreu i qeverisë indiane, Modi gjatë një takimi me mbështetës të partisë së tij.
Ligji i ri për nënshtetësinë, lehtëson aplikimet për marrjen e vizës për pakicat fetare në mënyrë të më pas të aplikojnë për nënshtetësinë indiane. Ky ligj vlen për vendet fqinje të Indisë si Afganistani, Bangladeshi, Pakistani, por përjashton popullsinë me përkatësi fetare islame.
Protestuesit kundër ndryshimit të ligjit kanë reaguar ashpër duke shprehur shqetësimin se ligji kërcënon seriozisht Kushtetutën laike indiane dhe nënshtetësinë e myslimanëve indianë.
Kryeministri Modi theksoi gjithashtu gjatë takimit se qeveria e tij nuk paraqet reforma të cilat kanë paragjykime fetare. Sipas tij partitë opozitare po përpiqen të shtrembërojnë faktet në mënyrë që të frikësojnë popullin dhe të dobësojnë qeverinë.
“Opozita po bën çdo përpjekje për të më rrëzuar nga pushteti”,- tha Modi. Ai i ka bërë thirrje që protestuesit të ndalojnë përdorimin e dhunës.
Narendra Modi gjatë karrierës së tij politike, dhe para se të zgjidhej kryeministër, është akuzuar për ndjekjen e politikave nacionaliste hindu dhe shkeljen e të drejtave të njeriut për popullsitë që nuk i përkasin besimit hindu.
Raportohet se deri tani qeveria indiane ka ndërmarrë një qasje të ashpër kundër protestuesve. Këto veprime sjellin në memorien e indianëve politikat kolonialiste britanike ku tre ose katër persona ndaloheshin të mblidheshin së bashku në mënyrë që të evitoheshin protestat. Interneti gjithashtu është ndërprerë në disa shtete.
Shoqëria civile shpesh ka akuzuar qeverinë se qëllimisht nxit përçarje mes popullsisë së besimit hindu dhe popullsisë myslimane duke përkrahur ekstremistët e djathtë./Fjala.al/Burimi: DW, Indian Times/
