Nga Elton Qyno
Teksa kanë kaluar mbi dy vite nga vdekja e 33-vjeçarit Saimir Sula në Spanjë dhe transportimi i tij pa zemër drejt Shqipërisë, ka detyruar prokurorinë e Tiranës, të nisë një letërporosi të dytë në drejtim të autoriteteve të Drejtësisë Spanjolle.
Ndryshe nga letërporosia e parë ku prokuroria kërkonte përmbushjen e 10 detyrave, këtë herë akuza e kryeqytetit, i ka kërkuar spanjollëve që zemra e Saimir Sulës, ti nënshtrohet një analize ADN-je.
Kjo lëvizje e prokurorisë, vjen pas një kërkese të bërë nga vetë familjarët e Saimir Sulës, të cilët kanë ngritur dyshime se zemra që mbahet në spitalin “Hospital Del Mar, mund të mos jetë e Saimir Sulës.
Autoritet Spanjolle kanë konfirmuar se zemra e pacientit Sula që ndëroi jetë në muajin Maj 2020, ndodhet në një nga laboratorët e spitalit.
Por deri në këtë fazë, ky organ nuk është tërhequr zyrtarisht nga prokuroria shqiptare por edhe nga vetë familjarët e viktimës, të cilët duan të binden plotësisht se zemra i përket djalit të tyre Saimir Sula.
Pa u njohur me rezultat e analizës së ADN-së, autoritet Shqiptare s’mund të tërheqin zemrën nga spitali i Barcelonës. Rezulton se për këtë çështje, ku një shqiptar i vdekur në Spanjë erdhi në Shqipëri pa zemrën në trup, prokuroria e Tiranës në 9 dhjetor 2020, rregjistroi një hetim.
Dosja me Nr.6607 është rregjistruar për akuzën e “Shit-Blerjes së paligjshme të organeve”.
Mësohet se kjo çështje është bërë problem diplomatik, pasi një muaj më parë Ambasada Spanjolle në Tiranë, ka kërkuar informacion mbi ecurinë e hetimeve që po zhvillohen në Shqipër. Kërkesa për tu informuar ka ardhur pak ditë, para se në Shqipëri të mbërinte në muajin Gusht 2022 kryeministri Spanjoll, Pedro Sanchez.
Ngjarja e rëndë ka ndodhur në spitalin “Hospital Del Mar” në Barcelonë Spanjë. Saimir Sula së bashku me motrën e tij, Majlindën, jetonin në këtë qytet prej vitesh.
Në dosjen hetimore sqarohet se Saimiri vuante nga probleme mendore pasi kishte halucinacione dhe ishte një përdorues droge. Pasditen e 8 majit 2020, Saimiri kishte temperaturë dhe shkoi në spital.
Atje i verifikua se nuk kishte COVID, pasi testi doli negativ, megjithatë qëndroi në spital.
Teksa qëndronte në spital, ai i ka shkruar motrës mesazhe si: “…Hajde më merrni, po më marrin frymën, po vdes…”.
Të nesërmen kur motra shkoi për ta marrë nga spitali, mjekët i komunikuan se vëllai i saj kishte ndëruar jetë.
Familja ka sjellë trupin e pajetë në Tiranë, për ti bërë ceremoninë e varrimit, por ka konstatuar se 33-vjeçari kishte ndërhyrje kirurgjikale në gjoks.
Pas autopsisë së bërë, u konstatua se në trupin e tij mungonte organi jetësor i zemrës.
