Gareth Southgate është i ndërgjegjshëm se është në presion, por thotë se është i bindur se ai është njeriu i duhur për të udhëhequr kombëtaren e Anglisë në Botërorin e Katarit. Pasi arritën në gjysmëfinalet e turneut të katër viteve më parë në Rusi, ndërsa në Europianin e fundit shkuan në finale, “Tre Luanët” mbeten një nga favoritet për të triumfuar në Katar këtë dimër.
Por gjërat nuk kanë shkuar mirë këto muajt e fundit, ku ata ranë në Ligën B të Ligës së Kombeve përpara se të luhet ndeshja e fundit e grupit kundër Gjermanisë sot në “Wembley”.
Southgate u vërshëllye nga disa prej tifozëve në “San Siro” pas humbjes 1- 0 me Italinë të premten, e cila ishte ndeshja e pestë pa fitore. Kjo ka rritur presionin mbi ishullorët, të cilët do ta nisin Botërorin në 21 nëntor në ndeshjen kundër Iranit.
“Unë mendoj se jam njeriu i duhur për ta dërguar skuadrën në turne. Mendoj se kjo është mënyra më e sigurt, padyshim. Nuk mendoj se loja kundër Italisë ishte shumë e dobët.
E di që do të tallen me ne për shkak të serisë së humbjeve. Por mua më duhet ta ndaj verën dhe rrethanat e këtyre muajve nga kjo ndeshje”.
I pyetur nëse ai ka besim se Anglia do të ketë kthyer faqe kur të afrojë Botërori, Southgate u përgjigj:
“Po, padyshim. Ne po luajmë dhe kemi luajtur kundër disa prej skuadrave të nivelit më të lartë dhe do të përmirësohemi nga kjo. Dhe në veçanti do të kenë fituar lojtarët e rinj që duhet të kenë mësuar shumë prej tyre. E dimë që duhet të përmirësohemi”.
