Sulmuesi i Liverpoolit, Luis Diaz, do të humbasë pjesën më të madhe të vitit si i lënduar, pas humbjes ndaj Arsenalit në fundjavë.
Kolumbiani ka qenë në formë të mirë për skuadrën e Jurgen Klopp këtë sezon, një nga lojtarët e paktë që mund ta pretendojë këtë, duke vazhduar fillimin e tij të shkëlqyer të jetës në Premier League, pas kalimit në janar.
Sulmuesi ka tre gola dhe dy asistime në ligë deri më tani këtë sezon, duke përfshirë asistimin tek Darwin Nunez të dielën.
Megjithatë, ai çaloi përpara pjesës së parë, i zëvendësuar nga Roberto Firmino, pasi më parë kishte pësuar një ndërhyrje nga Thomas Partey.
Sipas James Pearce, si dhe raportimeve në Kolumbi, ish-ylli i Portos tani do të humbasë gjashtë deri në tetë javët e ardhshme për Reds.
Kjo do ta çojë atë përtej 13 nëntorit, edhe në kthimin e tij më të hershëm, ndeshjen e fundit të sezonit përpara pushimit për Kupën e Botës.
Duke qenë se Diaz dhe Kolumbia nuk kanë arritur të kualifikohen për turneun në Katar, kjo do të thotë se ai nuk do të luajë më deri në ndeshjen kundër Aston Villas në 26 Dhjetor.
Kishte dhe një lajm tjetër të keq për Reds të dielën, me Trent Alexander-Arnold që duhej të zëvendësohej në pjesën e parë, gjithashtu për shkak të një lëndimi, por anglezi pritet të mungojë më pak se kolumbiani.
