Europa League në këtë vit do të kthehet në një turne shumë të ndjekur nëse sipas situatës aktuale të grupeve, aty do të përfundojnë Barcelona, Juventusi, Milani, Sevilla, Ajax apo Atletico Madrid. Një situatë që nuk i pëlqen edhe aq Jose Mourinhos i cili me Romën e tij shpreson që të ecë sa më shumë në këtë turne.
Skuadrat që dalin të tretat në Champions League luajnë në një play-off me skuadrat që dalin të dytat në grupet e Europa League dhe Roma mund të përballet me një prej këtyre ekipeve të cilat padyshim marrin menjëherë rolin e favoritëve, siç ka pranuar edhe vetë Mourinho me një sulm të hapur ndaj skemës së UEFA-s që kishte krijuar këtë çudi.
“Pas pak do të mbërrijnë të gjithë peshkaqenët që kanë dështuar në Champions. Atyre do t’u duket diçka e madhe pasi në atë pikë do të kthehen në favoritët e turneut. Sipas meje, nuk duhet të kthehen në lojë këtu, por ky është realiteti”, ishin thumbimet e tij ndaj skuadrave që pritet të vijën nga turneu më i rëndësishëm për klube në Europë.
