Kreu i Grupit Parlamentar i Partisë Socialiste, Taulant Balla ka akuzuar nga foltorja e Kuvendit kreun e PD-së Sali Berisha për bashkëpunim me Rusinë. Nga foltorja e Kuvendit, Balla nënkuptoi se Berisha ka marrë para ruse dhe se emri i tij ndodhet në llogaritë e Kremlinit. Më tej Balla tha se në ditët në vijim do të dalin fakte që vërtetojnë se Berisha është financuar nga Rusia.
Gjithashtu ai ironizoi Berishën, teksa tha se kush e ka fajin për këto financime, duhet ta ndajë vetë Berisha me Bashën tek emisioni i dashurisë “Përputhen”.
“Mbi ty Sali do të bëjmë publike fakte se si lidhesh ti personalisht. Nuk është çudi që vota jote në janar 2015 është dhënë pro një rezolute të bërë nga Vladimir Putin.
Sali ti je informuar që në vitin 2008 për atë rezolutë. Të është thënë që po përgatitet një baltë e madhe kundër shqiptarëve dhe UÇK-së dhe ti nuk reagove fare. Ke hyrë në listë pagesat e Kremlinit. Para diçkaje shumë të madhe, ishte bërë një zhurmë. Ndodhi Gërdeci dhe 30 ditë më vonë u kalua rezoluta e Dick Marty-t. Ndodhën vrasjet më 21 janar, por u votua rezoluta.
Ditët në vijim do të dalin faktet e kësaj listëpagese që kulmoi me firmën e Lulit, por me porosinë e Saliut.
I ndani ju tek emisioni “Përputhen” kush e ka fajin, por ajo që po flas unë këtu është për disa dokumente që unë i kam dhe që Saliu e di shumë mirë”, theksoi Balla.
