Një shtetas shqiptar është shpallur në kërkim pasi akuzohet për vrasjen e një 45-vjeçari maroken në Cornaredo, Milano. Sipas mediave italiane e dashura e shqiptarit kishte bërë debat me marokenin dhe kaq ka mjaftuar që shqiptari të nxjerrë armën dhe të qëllojë ndaj tij.
Të dielën në mbrëmje, banorët e zonës qendrore të Cornaredo kanë telefonuar policinë pasi kanë dëgjuar disa të shtëna pranë një lokali të zonës. Kur policia ka shkuar në vendngjarje, ka gjetur një makinë në mes të rrugës dhe një burrë brenda saj i cili ishte pa ndjenja. Ai është transportuar me urgjencë në spital por nuk ka mundur të mbijetojë për shkak të 2 plagëve të marra.
Nga hetimet e deritanishme është zbuluar se sherri mes marokenit dhe të dashurës së shqiptarit ka nisur brenda lokalit. Sapo marokeni ka dalë jashtë lokalit, shqiptari e ka qëlluar disa herë me armë. 45-vjeçari maroken ka hipur brenda makinës për të shkuar në spital por ka humbur ndjenjat.
Mësohet se shqiptari pasi ka vrarë shtetasin maroken i ka thënë: “Kështu do mësosh të respektosh femrat.”
