Në vigjilie të 110-vjetorit të Pavarësisë së Shqipërisë, ditën që shënjoi historinë e një kombi, analisti Roland Qafoku ka ndarë një foto tepër të veçantë në rrjetin e tij social Facebook.
Në foto shihet pena origjinale, me të cilën u nënshkrua akti i Shpalljes së Pavarësisë në Vlorë më 28 nëntor 1912.
“Kjopenë besohet se ishte pjesë e takëmeve të Ismail beut”, shkruan ndër të tjera Qafoku.
Postimi i plotë:
Pena e artë që firmosi proklamatën e pavarësisë
Kjo është pena orgjinale me të cilën u nënshkrua akti i Shpalljes së Pavarësisë në Vlorë më 28 nëntor 1912. 40 burra, përfaqësues nga të gjitha krahinat e Shqipërisë firmosën një e nga një pikërisht me këtë penë dokumentin më të rëndësishëm në historinë e shtetit shqiptar. Ndërsa fleta ku u hodhën firmat është e vërtetuar se ishte shkëputur nga një bllok shënimesh, kjo penë besohet se ishte pjesë e takëmeve të Ismail beut. Me atë ai firmosi shkresa pa fund që u shndërruan në telegrame që nga udhëtimi në Evropë derisa mbërriti në Durrës por edhe gjatë udhëtimit për në Vlorë. Me këtë penë ai firmosi sa e sa shkresa pas shpalljes së Pavarëisë. Bri kësaj pene është edhe një shkresë e firmosur nga Ismail Qemali si kryeministër, ose siç shkruhet aty si President i qeverisë së përkohshme.
