Në NBA, Miami vazhdon të fitojë dhe siguron edhe ndeshjen e 3-të të finaleve të Konferencës së Lindjes.
Heat u imponuan 128-102 Celtics, duke shkuar në 3-0, dhe tani do t’u mjaftojë edhe një tjetër fitore për të arritur finalen e madhe kundër Denver Nuggets ose Los Angeles Lakers.
Ndeshja nuk lë vend për justifikim për Celtics dhe afron Miamin jo vetëm me titullin në Lindje, duke realizuar hakmarrjen, pasi u eliminuan vitin e kaluar pikërisht përballë Boston.
Që në Florida nuk do të kishte garë u kuptua që në pjesën e pare, të cilën të zotët e shtëpisë e mbyllën me një avantazh prej 15 pikësh, (61-46), por ishte në periodën e tretë me rezultatin 32-17 që ndeshja u arkivua krejtësisht.
12 minuta nga sirena finale diferenca ishte plot 30 pikë, kështu që në periodën e katërt Celtics ia dolën vetëm ta reduktonin pak diferencën.
Përfundoi edhe këtë herë me triumfin e Miami falë 29 pikëve të Vincent, 22 të Robinson dhe 18 të Martin, ndërkohë që për këtë herë Jimmy Butler nuk e ekzagjeroi duke e mbyllur me 16 pikë.
Mes radhëve të Boston, në krahun tjetër, më i miri ishte Jayson Tatum, me double – double prej 14 pikësh dhe 10 rikuperime, por me vetëm 33% të goditjeve të realizuara.
Nuk mjaftuan as 12 pikët e shënuara nga Brown, Pritchard dhe Grant Williams, përtej 11 pikëve të Kornet.
Zhgënjyen si Horford dhe Smart, të dy në kuotën e 8 pikëve. Në natën mes të martës dhe të mërkurës do të luhet ndeshja e katërt, sërish në Miami.
Është i pari “match point” për Heat që janë shumë pranë rikthimit në finale pas 3 vitesh mungesë.
Herën e fundit ndodhi me Lakers, edhe pse këtë herë vështirë se do të ketë bis duke qenë se Lebron James me shokë kanë zhgënjyer përballë Denver.
