Koreja e Jugut ishte ndër vendet e para në botë që, pas Kinës, konfirmoi praninë e koronavirusit dhe brenda tre ditësh, 19-21 janar, raportoi për 346 persona të infektuar. Shifrat ishin alarmante për faktin se po bëhej territori i parë jashtë Kinës ku virusi i panjohur përhapej me shpejtësi të rrezikshme.
Në një situatë ku informacioni mbi virusin ishte i pakët, autoritetet koreane shfrytëzuan mundësinë e vetme që kishin në dispozicion: eksperiencën e së kaluarës në përballimin e sëmundjeve të tjera të ngjashme.
Në vitin 2015, Koreja e Jugut ishte shteti më i goditur në Lindjen e Largët nga virusi MERS, sëmundje që u shfaq fillimisht në Lindjen e Mesme dhe fatmirësisht nuk pati përhapjen që po ndodh me koronavirusin. Të paktën 32 persona vdiqën në Kore dhe autoritetet identifikuan si shkakun kryesor mungesën e kiteve për realizimin e testeve.
Të gjendur së fundmi në një situatë akoma më të vështirë me COVID-19, autoritetet në Seul vendimin e parë që morën ishte prodhimi i sa më shumë kiteve për realizimin e testeve që do të bënin të mundur identifikimin e personave të infektuar.
Në shtetin me 52 milionë banorë, sipas ‘The Wall Street Journal’, 1 në 200 banorë është testuar nëse ka apo jo koronavirus. Aktualisht, numri i të infektuarve është 7024, i personave që kanë ndërruar jetë është 75 dhe i të shëruarve 1137.
Për mediat ndërkombëtare këto shifra tregojnë se Koreja e Jugut është shteti model që duhet ndjekur në menaxhimin e krizës së koronavirusit, i kthyer tashmë në pandemi botërore. The Washington Post, duke vlerësuar reagimin e qeverisë koreane, i konsideron veprimet e saj si shembujt që duhen ndjekur nga drejtuesit në Uashington. Numri i personave të testuar në Kore është 700 herë më i lartë se në SHBA, raporton Fjala.al.
Ndërkohë që rastet e reja me koronavirus në Kore janë më të ralla dhe jeta vazhdon normalisht, edhe Organizata Botërore e Shëndetësisë ka dalë me rekomandimin se COVID-19 luftohet vetëm nëpërmjet testeve.
“Teste, teste, teste”, kjo ishte fjala e përsëritur disa herë sot nga Tedros Adhanom Ghebreyesus, drejtori i Përgjithshëm i OBSH. Ai theksoi se karantina është një mundësi e mirë për izolimin e virusit, por kjo nuk i jep zgjidhje situatës. Sipas tij, koronavirusi nuk mund të zhduket nëse nuk dihet se kush është infektuar, pasi në këtë mënyrë do të qarkullojë vazhdimisht. Ndaj, kreu i OBSH-së kërkon nga shtetet që të realizojnë sa më shumë teste të qytetarëve.
Ashtu si çdo shtet, edhe Shqipëria duhet të ketë në vëmendje rekomandimin më të fundit të OBSH-së, organizatës ku bën pjesë. Koronavirusi luftohet vetëm nëpërmjet testeve. Kitet për realizimin e tyre nuk janë të lira, por as jeta nuk ka çmim. 563 teste janë kryer në të gjithë vendin dhe 51 persona rezultojnë pozitiv.
Koreja e Jugut është modeli që duhet ndjekur sot dhe në vazhdim, jo Italia. Vetë presidenti koreano-jugor, Moon Jae-in ka shprehur gatishmërinë për të organizuar një samit ‘online’ me liderët e G20-ës (shteteve më të zhvilluara të botës) ku do të ndajë eksperiencën e vendit të tij në përballjen me koronavirusin. Ai i ka sugjeruar presidentit të SHBA-së, Donald Trump, thirrjen e këtij samiti. Të njëjtën ide e ka diskutuar edhe me Emmanuel Macron, president i Francës.
Ashtu siç tregon shembulli i Koresë së Jugut dhe siç e theksoi edhe kreu i OBSH-së, nëse duam të dalim nga karantina, mesa duket ka vetëm një zgjidhje: teste, teste, teste.
k.s/Fjala.al
