Ministria e Drejtësisë kërkon nga prokuroria dhe gjykatat të aplikojnë masat e dënimit alternativ.
Prej 3 ditësh, më 14 mars, Etilda Gjonaj ja ka përcjellë kërkesën Këshillit të Lartë të Prokurorisë, Këshillit të Lartë Gjyqësor dhe institucioneve të drejtësisë.
Gjonaj kërkon nga prokuroria dhe gjykata të inkurajohen për zbatimin e masave alternative ndërsa shkruan se “kërkojmë angazhimin tuaj maksimal për të vepruar në një kohë sa më të shpejtë, me qëllim parandalimin e rritjes së numrit të personave që vuajnë dënimin në institucionet e vuajtjes së dënimit, kjo dhe në kuadër të nevojës së përballimit të pandemisë globale me të cilën po përballemi dhe rrezikut që ekziston për infektimin e personave që ndodhen aktualisht në këto institucione nga personat që futen rishtazi‘‘.
Çdo person që arrestohet apo futet në paraburgim ai i nënshtrohet menjëherë një kontrolli mjekësor për vlerësimin e gjendjes së tij dhe nëse ka apo jo simptoma të COVID-19.
Masat merren për të mbrojtur 5200 persona që ndodhen të dënuar e paraburgosur si dhe stafin në shërbim të tyre prej 4050 punonjësish.
