Armando Broja është gati të rikthehet në fushë nga dëmtimi i gjatë dhe këtë do ta bëjë duke marrë minuta me ekipin U-21 të Chelsea në ditët e ardhshme. Kështu të paktën thuhet në një artikull të “The Daily Mail”, ku pretendohet se sulmuesi i Kombëtares shqiptare është rikthyer në stërvitje të plotë me blutë në Cobham (qendra stërvitore e bluve).
Pas dëmtimit të ligamentit në muajin dhjetor në një miqësore kundër Aston Villa, futbollisti do të luajë të paktën një nga ndeshjet për ekipin U-21. Në kalendar, skuadra e të rinjve u përball dje me Lutonin, teksa Broja nuk ishte, por për të zbritur në fushë është projektuar takimi i së premtes kundër Manchester Cityt U-21 dhe ndaj Northampton U-21 të martën e ardhshme.
Ky është një lajm fantastik për t’u dëgjuar në një kohë kur kërcënimi për golin te Chelsea duket po aq i paefektshëm sa dy sezonet e fundit. Shpresat nuk po vendosen të gjitha te talenti i Brojës për të zgjidhur problemet e ekipit, por do të jetë një nxitje e madhe për skuadrën kur ai të mund të konkurrojë me Nicolas Jackson për pozicionin e numrit 9 në sulm.
