“Roli i një miku është të jetë pranë teje kur je në gabim, sepse çdokush do të jetë pranë teje kur ti ke të drejtë.” Vlera e miqësisë mund përcaktohet mjaft mirë në këtë shprehje të thjeshtë, por efektive të shkrimtarit amerikan Mark Twain. “Të kuptosh vlerën e miqësisë do të thotë të kuptosh pasojat pozitive që ajo ka në shëndetin tonë. Pavarësisht frikës nga zhgënjimet, largësia apo keqkuptimet, të kesh miq do të thotë të kesh vazhdimisht mbështetje. Prania e tyre, këshillat apo të pasurit e dikujt me të cilin/ën qajmë apo qeshim, në fakt na ndihmon të ndihemi më të fortë kur duhet të përballemi me vështirësi,” shpjegojnë ekspertët në Guidapsicologi.it.
Një pyetje lind spontanisht. Sa miq na duhen që të jemi vërtet të lumtur? A vlen thënia “pak dhe saktë”? Këtyre pyetjeve iu përgjigj një ekip studiuesish nga Fudan University në Kinë. Studimi zbulon se gjatë adoleshencës, një periudhë në jetë gjatë së cilës ndodhin shumë ndryshime, nevojiten konfirmimet sociale, por jo domosdoshmërisht miqësitë.
Numri i përsosur i miqve me të cilët mund të ndani gëzimet dhe hidhërimet do të ishte pesë. “Miqësitë e vërteta ndërtohen me kalimin e kohës, por efektet e tyre pozitive zgjasin shumë. Miqësia manifestohet ditë pas dite, në momente të vështira, por edhe pozitive dhe nuk i tremben distancës fizike dhe kohës. Sipas një studimi të mëparshëm amerikan nga Brigham Young University, mungesa e marrëdhënieve shoqërore shkakton pasoja të rënda shëndetësore të ngjashme me konsumimin e duhanit apo alkoolit. Për të përfituar nga efektet e dobishme të miqësisë, duhet të jeni në gjendje të dalloni miqtë e vërtetë nga njohjet e rastit. “Më mirë të shmangni ata miq që deklarohen si të tillë brenda pak ditëve dhe largohen, si edhe ata që ju shkatërrojnë vetëvlerësimin përmes kritikave jokonstruktive,” përfundojnë ekspertët./E.Ç
