Basim Naim, kreu i Këshillit Politik të organizatës së Hamasit, përgjegjës për marrëdhëniet ndërkombëtare ka folur në lidhje me sulmin ndaj Izraelit. Ai është shprehur se kishin 2-3 vite që përgatiteshin për sulmin.
“Ne po përgatiteshim për dy, ndoshta edhe tre vjet. Në nivele të ndryshme. Jemi të rrethuar, nuk mund të plotësojmë nevojat tona, por megjithatë udhëheqja ushtarake përgatiti planet dhe informacionin se si funksionon armiku, ku ndodhen repartet ushtarake”, tha ai.
Basim Naim e quajti sulmin e 7 tetorit një “akt mbrojtjeje”, teksa për herë të parë tregoi edhe vendet që ndihmojnë këtë organizatë terroriste.
“Ne kërkojmë mbështetje nga kushdo. Kjo ndihmë mund të jetë financiare. Për shembull ne marrim shumë mbështetje financiare nga Katari. Mbështetje diplomatike dhe politike nga Rusia dhe Kina. Ne marrim mbështetje ushtarake dhe trajnime nga Irani. Ndihma humanitare nga Egjipti. Varet se kush dëshiron të ndihmojë. Nëse dikush dëshiron të ndihmojë financiarisht, është i mirëpritur. Edhe politikisht, apo diplomatik apo ushtarak, ai është i mirëpritur”, theksoi ai për “ANT1”./E.T
