Gjykata e Tiranës ka dënuar me 6 muaj burg komandon e ‘Zall-Herrit’ Renild Ajazi, pasi ky i fundit braktisi misionin ushtarak në Mbretërinë e Bashkuar.
Renild Ajazi, komandoja i Zall-Herrit i koduar si “Ushtar IV” që në tetor 2017 me urdhër të ministrit të Mbrojtjes shkoi në Angli për stërvitjen e përbashkët me emër “Cambrian Patrol 17”, në Wells me Mbretërinë e Bashkuar, është dënuar me 6 muaj nga gjykata e Tiranës.
Ushtari Ajazi nga zona e Gramshit, në fund të janarit 2020 është shpallur fajtor, për akuzën e “Dezertimit”.
Ajazi, ka braktisur trupën e ushtarakëve që kishin shkuar në Angli për stërvitje dhe sot e kësaj dite nuk dihet se në çfarë vendi të Anglisë, ndodhet ai.
Sipas vendimit të gjykatës së Tiranës Ajazi i titulluar “ushtar IV”, me Urdhrin e Ministrit të Mbrojtjes “Për pjesëmarrjen e personelit ushtarak të Forcës Tokësore në stërvitjen “Cambrian Patrol 17”, në Wells, Mbretëria e Bashkuar”, është caktuar pjesëtar i Forcës Tokësore Zall-Herr Tiranë.
Ajazi do të merrte pjesë në stërvitjen e përbashkët “Cambrian Patrol 17”, në Wells, Mbretëria e Bashkuar, gjatë periudhës 4 tetor 2017 deri në 16 tetor 2017.
Mirëpo pas përfundimit të stërvitjes, më 17 tetor 2017 është bërë lëvizja e efektivit ushtarak për në drejtim të Londrës, i shoqëruar nga pala angleze.
Në 17 tetor 2017, është bërë akomodimi i efektivit ushtarak në bazën ushtarake “Hyde Park Barracks”.
Pas akomodimit, ushtarakët po në 17 tetor 2017, kanë vizituar pika të ndryshme historike e kulturore të qytetit të Londrës.
Ditën e nesërme në 18 tetor 2017, rreth orës 08:00, nga ana e përgjegjësit të ekipit Togerit Roland Poçi, është vënë re mungesa e ushtarit Renild Ajazi.
Menjëherë pas këtij konstatimi, përgjegjësi i ekipit është munduar të komunikojë me telefon me Renild Ajazi. Togeri është mundur të lidhet në telefon me komandon, por e ka pasur të pamundur.
Në këto rrethana Roland Poçi ka njoftuar në linjën e tij të komandimit në Shqipëri dhe Atasheun Ushtarak në Angli.
