Një hetim i regjistruar nga SPAK për dyshimet e korrupsionit dhe abuzimit me tendera, ka çuar Byronë Kombëtare të Hetimit të kryejë kontrolle në banesën e ish-ministrit Ilir Beqaj, disa farmaci dhe personave të lidhur me të.
Mësohet se SPAK është duke verifikuar rolin e Beqajt si ministër Shëndetësie në lidhjen e disa kontratave me farmaci në Tiranë, por edhe procedura të tjera.
Gjatë kontrolleve që nisën të enjten dhe vijuan edhe këtë të premte, u sekuestruan dokumente dhe pajisje elektronike, që do t’u nënshtrohen akt-ekspertimeve për të kuptuar nëse mund të ndihmojnë hetimet.
Beqaj aktualisht është nën hetim nga SPAK dhe me masë sigurimi detyrim për t’u paraqitur si i dyshuar se ka shpërdoruar detyrën në konçensionin e sterilizimit.
Për këtë konçension, Prokuroria thotë se është dhënë në kushtet e konfliktit të interesit të biznesmenit Ilir Rrapaj, pasi i gjetën lidhje dhe kontakte të tij me Beqajn dhe ish-zëvendëministrin Klodian Rjepaj, edhe ky i fundit nën hetim me masë sigurimi “Arrest në burg”./O.S